एनआरएन आईसीसीको बैठकद्वारा बिबिध निर्णय

यूरोनेपाल अनलाईन प्रतिनिधि
ब्रसेल्स बेल्जियम, डिसेम्बर २२।

गैरआवासिय नेपाली संघ (एनआरएनए) अन्तर्राष्ट्रिय समन्वय परिषदको नियमित बैठक १३ र २० डिसेम्बर २००९ का दिन सम्पन्न भएको छ ।

एनआरएन आईसीसी केन्द्रीय अध्यक्ष देवमान हिराचनको अध्यक्षतामा सम्पन्न भएको उक्त बैठकमा प्रमुख संरक्षक डा. उपेन्द्र महतो, संरक्षक भिम उदास लगायत केन्द्रीय समितिका उपाध्यक्ष जीवा लामिछाने, सागर नेपाल, महासचिव रतन झा, सचिव तेन्जि शेर्पा, कोषाध्यक्ष रामेश्वर शाह, प्रवक्ता डा.कुमार बस्नेत र क्षेत्रीय संयोजकहरु, उपसंयोजकहरु, केन्द्रीय सदस्यहरुले विश्बभरबाट टेलिकन्फ्रेन्सको माध्यमद्वारा बैठकमा भाग लिएका थिए ।

बैठकपछि केन्द्रीय समितिका प्रवक्ता डा. कुमार बस्नेतले जारी गर्नुभएको प्रेस अवक्तव्य यस प्रकार रहेको छ-

गैरआवासिय नेपाली संघ (एनआरएनए) को नियमित बैठक संघको अध्यक्ष देवमान हिराचनको अध्यक्षतामा १३ र २० डिसेम्बर २००९ मा सम्पन्न भएको छ । संघका महासचिव रतन झाले टेलिकन्फ्रेन्सको माध्यमद्वारा संचालन गर्नु भएको उक्त बैठकको निर्णयहरुको संक्षिप्त जानकारी तल दिएको छ ।
१- गैरआवासिय नेपाली संघ केन्द्रीय समितिले संघका निवर्तमान अध्यक्ष डा. उपेन्द्र महतोलाई प्रमुख संरक्षकमा बसिदिन गरेको विशेष अनुरोधलाई डा. महतोले स्विकार गर्नु भएकोमा बैठकले उहाँको निर्णयको स्वागत गरेको छ ।
२- गैरआवासिय नेपाली संघको सल्लाकारमा डा. कुल चन्द्र गौतम (अमेरिका, नेपाल) , डा. सूर्य सुवेदी (बेलायत) , सारदा जंग थापा (अमेरिका) , बिश्व कान्त मैनाली (नेपाल) , ईन्दिरा वन (अस्ट्रेलिया) , डा. देव काजि डंगोल (कतार) र डा. जुगल भूर्तेल (रुस) लाई मनोनयन गरिएको छ ।
३- गैरआवासिय नेपाली संघको केन्द्रीय सदस्यमा मध्यपूर्वबाट आशिष शेरचन (कतार), यास्मिन बेगम (साउदी अरब), उत्तर अमेरिकाबाट सोनम लामा (अमेरिका), राधा बस्न्यात (क्याण्डा), ओसेनियाबाट डा. कृष्ण हमाल (अस्ट्रेलिया), राजु शाक्य (अस्ट्रेलिया), युरोपबाट सापिला राजभण्डारी (रुस), डा. हेम राज शर्मा (बेलायत) र एसिया प्रशान्तबाट डा. देबी बस्नेत (कोरिया), जे.एन. ज्ञवाली (हंगकंग) लाई मनोनयन गरिएको छ । त्यस्तै गरी, गैरआवासिय नेपाली संघको युवा संयोजकमा भवानी वली (अस्ट्रेलिया) र उपसंयोजकमा पुकार मल्ल (अमेरिका) लाई मनोनयन गरिएको छ ।
४- बैठकले "चौथो गैरआवासिय नेपाली क्षेत्रिय सम्मेलन" २८-३० मे २०१० मा अमेरिकाको, टेक्सास राज्यको हुस्टनमा सम्पन्न गर्ने निर्णय गरेको छ । उक्त सम्मेलनको संयोजन महासचिव रतन झाले गर्ने निर्णय गरिएको छ ।
५- गैरआवासिय नेपाली चौथो विश्व सम्मेलनको काठमाडौँ घोषणा पत्रलाई मध्यनजर राख्दै र संघको आवश्यकतालाई ध्यानमा राखि यस बैठकले बिभिन्न कार्यदलको गठन गरी ती कार्यदलका संयोजक तोकेको छ ।
१) दोहोरो नागरिकता, संयोजक : राम प्रताप थापा (संरक्षक)
२) अन्तर्राष्ट्रिय स्तरमा एनएनएन प्रवर्द्धन, संयोजक : भिम उदास (संरक्षक)
३) गैरआवासिय नेपाली संघको दर्ता, गैरआवासिय नेपाली ऐन, नेपालमा लगानी
(१०० मिलियन नेपाल लगानी कोष), संयोजक : देबमान हिराचन (अध्यक्ष)
४) एनआरएन कल्याणकारी परियोजना, संयोजक : जीवा लामिछाने (उपाध्यक्ष)
५) बैदेशिक रोजगार, संयोजक : सागर नेपाल (उपाध्यक्ष)
६) ईन्सटिटिउसन्लाइजेसन, रुल्स, एडमिनिसट्रेसन, संयोजक : रतन झा (महासचिव)
७) नेपाल प्रवर्द्धन, संयोजक : तेन्जि शेर्पा (सचिव)
८) एनआरएनए सस्टेनाबिलिटी, संयोजक : रामेश्वर शाह (कोषाध्यक्ष)
९) सूचना तथा संचार, संयोजक : डा. कुमार बस्नेत (प्रवक्ता)
१०) नलेज, स्किल, संयोजक : डा. राजु अधिकारी (केन्द्रीय सदस्य)
११) बिदेशमा नेपाली सामान प्रवर्द्धन, संयोजक : डा. बद्री केसि (केन्द्रीय सदस्य)
१२) विधान समिति, संयोजक : गणेश इजम (एशिया प्रशान्त संयोजक)

६- ११ डिसेम्बर २००९ का दिन विश्व जलवायु परिवर्तन सम्मेलनको अवसरमा सम्पन्न सगरमाथा आरोही र् यालीमा उपाध्यक्ष जीवा लामिछानेको नेतृत्वमा गैरआवासीय नेपाली संघले सफलतापूर्क सहभागी भएकोमा बैठकले सहभागिहरुलाई धन्यबाद दिएको छ । साथै बैठकले यस कार्यक्रममा सहभागी हुन नेपाल सरकारले गैरआवासीय संघलाई औपचारिक निमन्त्रणा दिएको कुराको प्रशंसा गर्दै नेपाल सरकारलाई धन्यवाद दिएको छ ।
आगामी नेपालको संबिधानमा दोहोरो नागरिकता समाबेश गर्नको लागि नेपाल सरकारलाई अनुरोध गर्न गैरआवासीय नेपाली संघले प्रत्येक देशको नेपाली राजदूतावासमा ३१ डिसेम्बर २००९ सम्ममा ज्ञापन पत्र हस्तान्तरण गर्ने निर्णय गरिएको छ ।

  Email this News          Viewers Comment